املا کی تعریف
املا” کا لفظ باب افعال سے عربی مصدر ہے۔ عربی میں اس کا صحیح املا ہمزہ کے ساتھ ہے۔ املا کے لغوی معنی ہیں پر کرنا یاد رکھنا لکھنا لکھوانا اور رسی دراز کرنا ۔
ڈاکٹر عبد الستار صدیقی کے مطابق لفظوں کی صحیح تصویر کھینچنے کو املا کہتے ہیں۔
ڈاکٹر غلام مصطفیٰ خان کے بقول : املا در اصل لفظوں میں صحیح صحیح حرفوں کے استعمال کا نام ہے ۔
مولوی غلام رسول کے نزدیک کسی زبان کی عبارت یا لفظوں کو اس کی لکھاوٹ کے طریقے پر درست لکھنا املا کہلاتا ہے ۔
رشید حسن خاں رقم طراز ہیں: اردو کے رسم الخط کے مطابق لفظ میں حرفوں کی ترتیب کا تعین، ترتیب کے لحاظ سے اس لفظ میں شامل حروف کی صورت اور حرفوں کے جوڑ کا متعارف طریقہ ان سب کے مجموعے کا نام املا ہے ۔
یہ بھی پڑھیں: اردو قواعد و املا کے بنیادی اصول | PDF
مندرجہ بالا تعریفوں میں سے رشید حسن خاں کی تعریف زیادہ جامع ہے، جو املا کے جملہ پہلوؤں کو محیط ہے۔ اس تعریف سے تین بنیادی نکات سامنے آتے ہیں:
۱۔ لفظ میں حروف ترتیب کے مطابق درست ہوں ۔
۲۔ حروف اپنے اپنے مقام پر درست شکل میں ہوں، یعنی ان کی ترکیبی صورت درست ہو ۔ عموماً حروف کی تین بنیادی اتصالی شکلیں ( ابتدائی، وسطی ، آخری ) ہوتی ہیں۔ اس بات کا دھیان رکھا جائے کہ مطلوبہ لفظ میں کون سی شکل ہوگی۔ حروف کے اتصالی اصولوں کی پابندی کی جائے ۔
یہ بھی پڑھیں: اردو درست املا سیکھیں | PDF
۳۔ حروف کے جوڑ اور پیوند کا طریقہ بھی صحیح ہو۔ یعنی کشش ( مرکز ) شوشے گوشے، دائرے وغیرہ بھی درست ہوں۔
مندرجہ بالا امور کے ساتھ حروف کی تعداد کا تعین بھی ضروری ہے ۔ کسی لفظ کے لیے جتنے حروف مخصوص ہوں، اسے انھی حروف کی مدد سے لکھا جائے مثلاً "لیے” لکھتے وقت اگرنے "ے” کے نیچے نقطے بھی لگا دیے جائیں اور اوپر ہمزہ بھی ڈال دیا جائے تو یہ املا غلط ہوگا۔
اسی طرح علم بمعنی جھنڈا کو علم کی بجائے "الم” سے لکھنا صحیح نہ ہو گا نیز حسب ضرورت اعراب زبر، زیر، پیش تشدید و تنوین و غیرہ کا استعمال بھی ضروری ہے
مختصر یہ کہ املا سے مراد : ” الفاظ کو مقررہ اصول و ضوابط کے مطابق اس طرح لکھنا کہ پڑھتے وقت انھیں درست تلفظ سے ادا کیا جا سکے۔
پروف ریڈر۔ابرار حسین ،ملتان ،پاکستان ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حواشی
کتاب۔ اردو زبان: قواعد اور املا
موضوع ۔ املا کی تعریف۔
صفحہ۔ 100 تا 101
کورس کوڈ 9010
مرتب کردہ۔ اقصٰی فرحین