اردو ادب کی اہم اصطلاحات اور ان کی تعریفیں: ایک جامع گائیڈ، تحریر از احمد سیال ایم فل اردو یونیورسٹی آف پشاور 2025
موضوعات کی فہرست
اردو ادب (Urdu Literature) کو سمجھنے کے لیے اس کی بنیادی اصناف اور اصطلاحات کا علم ہونا ضروری ہے۔ چاہے آپ طالب علم ہوں یا ادب کے شائق، یہ گائیڈ آپ کو نثر، افسانے، ناول اور دیگر ادبی اصطلاحات کو آسانی سے سمجھنے میں مدد دے گی۔
یہاں ادب کے اہم سوالات اور ان کے جوابات آسان فہم انداز میں پیش کیے جا رہے ہیں۔
1. نثر (Prose) کسے کہتے ہیں؟
جواب: لغوی اعتبار سے لفظ نثر کا مطلب ہے "بکھیرنا” یا "بکھری ہوئی شے۔”
ادبی اصطلاح میں نثر سے مراد ایسی تحریر ہے جو وزن، بحر، ردیف اور قافیے کی پابندیوں سے آزاد ہو۔ آسان الفاظ میں، جب ہم اپنی بات کو شعری انداز کی بجائے عام ادبی پیرائے میں بیان کرتے ہیں تو اسے نثر کہا جاتا ہے۔
2. داستان (Dastan) کی تعریف کیا ہے؟
جواب: داستان ایک طویل اور تفصیلی قصے کو کہتے ہیں جو فرضی اور من گھڑت واقعات پر مبنی ہوتا ہے۔
- اس کا تعلق حقیقی دنیا کی بجائے تخیلاتی دنیا سے ہوتا ہے۔
- اس میں مافوق الفطرت عناصر (جیسے جن، دیو، اور جادوئی کرشمے) شامل ہوتے ہیں۔
- یہی حیرت انگیز اور محیر العقول واقعات داستان کو قاری کے لیے دلچسپ بناتے ہیں۔
3. ناول (Novel) کا مفہوم کیا ہے؟
جواب: لفظ ناول کے معنی ہیں "نیا” یا "انوکھا”۔
یہ ایک ایسی طویل کہانی ہوتی ہے جو ہماری حقیقی زندگی کی عکاسی کرتی ہے۔ ناول میں زندگی کے مختلف حقائق اور سماجی گوشوں کو پیش کیا جاتا ہے۔ اس میں فرضی کرداروں کے ذریعے انسانی زندگی کے مسائل کو حقیقت پسندانہ انداز میں اجاگر کیا جاتا ہے۔ جیسے راجہ گدھ
4. افسانہ (Short Story) کسے کہتے ہیں؟
جواب: افسانہ نثری ادب کی وہ صنف ہے جس میں مختصر کہانی بیان کی جاتی ہے۔ اس میں پوری زندگی کی بجائے زندگی کے کسی ایک خاص پہلو یا واقعے کو موضوع بنایا جاتا ہے۔ افسانے کی خاص بات اس کا "وحدتِ تاثر” ہے، یعنی یہ قاری پر ایک سحر انگیز کیفیت طاری کر دیتا ہے۔ جیسے پریم چند اور منٹو کے افسانے
5. ناولٹ (Novelette) کیا ہے؟
جواب: جیسا کہ نام سے ظاہر ہے، ناولٹ ناول اور افسانے کے درمیان کی ایک کڑی ہے۔
- اس کی طوالت افسانے سے زیادہ لیکن ناول سے کم ہوتی ہے۔
- اس میں کرداروں کی تعداد محدود ہوتی ہے۔
- یہ زندگی کے کچھ مخصوص حقائق کا احاطہ کرتا ہے۔
6. انشائیہ (Inshaiya) کی تعریف
جواب: انشائیہ ایک ایسی نثری صنف ہے جس میں مصنف کسی بھی موضوع پر بغیر کسی رسمی پابندی کے اپنے ذاتی مشاہدات اور تاثرات بیان کرتا ہے۔ یہ تحریر مختصر ہوتی ہے اور اس کا انداز انتہائی دلکش اور شگفتہ ہوتا ہے۔
7. انشائیہ اور مضمون (Essay) میں کیا فرق ہے؟
جواب: اگرچہ انشائیہ اور مضمون ملتے جلتے ہیں، مگر ان میں باریک سا فرق ہے:
- مضمون: یہ ایک رسمی تحریر ہے جس میں موضوع کا احاطہ سنجیدگی سے کیا جاتا ہے اور اس کا ایک خاص نتیجہ یا خاتمہ ہوتا ہے۔
- انشائیہ: یہ غیر رسمی ہوتا ہے۔ اس میں نہ تو موضوع کی قید ہوتی ہے اور نہ ہی کسی حتمی نتیجے کی۔ انشائیہ نگار بات کو ادھورا چھوڑ دیتا ہے تاکہ نتیجہ قاری خود اخذ کرے۔
ادبی تنقید اور اصلاح
تنقید (Criticism) سے کیا مراد ہے؟
جواب: تنقید کا لفظ نقد سے مشتق ہے جس کا مطلب کھرے کھوٹے کو الگ الگ کرنا ہے لیکن اردو ادب میں کسی بھی ادبی پارے (شاعری یا نثر) کو فن کے ترازو میں تولنا تنقید کہلاتا ہے۔ اس عمل میں فن کے مقررہ معیارات کی روشنی میں تحریر کی خوبیوں (محاسن) اور خامیوں (معائب) کا تجزیہ کیا جاتا ہے۔
اصلاح (Correction) کسے کہتے ہیں؟
جواب: لغوی طور پر اصلاح کا مطلب درستی کرنا ہے۔ ادب میں اس سے مراد کسی کلام (نظم یا نثر) میں موجود فنی خامیوں یا غلطیوں کی نشاندہی کر کے انہیں دور کرنا اور تحریر کو بہتر بنانا ہے۔
مکالمہ اور خطوط نگاری
مکالمہ نگاری (Dialogue Writing)
جواب: جب دو یا دو سے زائد افراد کسی بھی موضوع پر آپس میں گفتگو کرتے ہیں، تو اس گفتگو کو ادبی شکل میں تحریر کرنا مکالمہ نگاری کہلاتا ہے۔
خطوط نگاری (Letter Writing)
جواب: اپنے دلی جذبات، خیالات، حالات یا کسی بھی قسم کی سرکاری و نجی معلومات کو تحریری شکل دے کر دوسرے شخص تک پہنچانا خطوط نگاری یا مکتوب نگاری کہلاتا ہے۔
کاتب، مکتوب اور مکتوب الیہ میں فرق
خطوط نگاری میں تین اہم اصطلاحات استعمال ہوتی ہیں:
- مکتوب: لکھے گئے خط کو کہتے ہیں۔
- کاتب: خط لکھنے والے شخص کو کہتے ہیں۔
- مکتوب الیہ: وہ شخص جسے خط لکھا جا رہا ہو (جسے خط بھیجنا مقصود ہو)۔
سوانح اور خاکہ نگاری
خاکہ نگاری (Sketch)
جواب: یہ ایک ایسا فن ہے جس میں مصنف کسی شخصیت کے عادات و اطوار، خوبیاں اور خامیاں اس طرح الفاظ میں ڈھالتا ہے کہ پڑھنے والے کے ذہن میں اس شخص کی جیتی جاگتی تصویر بن جاتی ہے۔ اسے لفظی تصویر کشی بھی کہا جا سکتا ہے۔ جیسے رشید احمد صدیقی کی گنج ہائے گراں مایہ۔
سوانح نگاری (Biography)
جواب: جب کوئی مصنف کسی دوسری اہم شخصیت کی پوری زندگی کے حالات، واقعات اور نشیب و فراز کو ترتیب سے تحریر کرتا ہے، تو اسے سوانح نگاری کہتے ہیں۔
جیسے مولانا الطاف حسین حالی کی یادگار غالب اور حیات جاوید وغیرہ
خود نوشت / آپ بیتی (Autobiography)
جواب: جب کوئی شخص اپنی زندگی کی کہانی، تجربات اور حالات خود اپنے قلم سے تحریر کرتا ہے، تو اسے خود نوشت یا آپ بیتی کہا جاتا ہے۔ جیسے شہاب الدین کی شہاب نامہ اور کشور ناہید کی بری عورت کی کتھا وغیرہ
رپورتاژ اور روداد
روداد (Proceedings)
جواب: یہ ایک سادہ صحافتی یا دفتری انداز کی تحریر ہے۔ کسی تقریب، جلسے یا واقعے کی کارروائی کو اطلاع دینے کی غرض سے سادہ الفاظ میں بیان کرنا روداد کہلاتا ہے۔ اس میں کسی بھی واقعے جلسے یا کاروائی کو من و عن بیان کیا جاتا ہے
رپورتاژ (Reportage)
جواب: یہ روداد سے مختلف اور زیادہ ادبی ہوتی ہے۔ جب کسی سفر یا واقعے کا آنکھوں دیکھا حال اس طرح جذباتی اور ادبی انداز میں لکھا جائے کہ قاری خود کو اس منظر کا حصہ محسوس کرے، تو اسے رپورتاژ کہتے ہیں۔ اس میں مصنف کے تخیلات اور مشاہدات بھی شامل ہوتے ہیں۔
دیگر اہم اصطلاحات
خلاصہ (Summary) کسے کہتے ہیں؟
جواب: کسی طویل تحریر، سبق یا ناول کے اہم نکات کو اس طرح مختصر کرنا کہ پوری تحریر کا نچوڑ سامنے آ جائے، خلاصہ کہلاتا ہے۔
مرکزی خیال (Central Idea) کیا ہے؟
جواب: کسی بھی تحریر کے پیچھے مصنف کا جو بنیادی مقصد یا سوچ کارفرما ہوتی ہے، اسے مرکزی خیال کہتے ہیں۔ یہ وہ کلیدی اور اہم نقطہ ہوتا ہے جس کے گرد پوری تحریر گھومتی ہے۔
نظر ثانی و تصحیح: کشف زمان ادارے کا نام گورنمنٹ گریجوایٹ کالج سمن آباد فیصل آباد