مولانا الطاف حسین حالی کی نظم نگاری تحریر از احمد سیال ایم فل اردو یونیورسٹی آف پشاور 2025
موضوعات کی فہرست
کسی بھی عظیم ادیب یا شاعر کی تخلیقی جہتوں کو سمجھنے کے لیے اس کے عہد کے سیاسی، سماجی اور تہذیبی پسِ منظر کا مطالعہ ناگزیر ہوتا ہے۔ مولانا الطاف حسین حالی کا ظہور ایک ایسے پرآشوب دور میں ہوا جب ہندوستان ۱۸۵۷ء کی ناکام جنگِ آزادی کے کرب ناک نتائج بھگت رہا تھا۔ ملک کی فضا مایوسی اور خوف سے مسموم ہو چکی تھی، اور ہر طرف بربریت کا ننگا ناچ جاری تھا۔ صدیوں پر محیط مسلمانوں کی شاندار سلطنت اور مغلوں کی بادشاہت زمین بوس ہو چکی تھی۔
آخری مغل تاجدار بہادر شاہ ظفر کی شان و شوکت خاک میں مل چکی تھی، اور نوبت یہاں تک آ پہنچی کہ جس دھرتی پر ان کی حکمرانی کا ڈنکا بجتا تھا، اسی مٹی میں انہیں دو گز زمین بھی نصیب نہ ہو سکی۔ انگریز سامراج کے مظالم اپنے عروج پر تھے اور بالخصوص مسلمان ان کی انتقامی کارروائیوں کا بدترین نشانہ بن رہے تھے۔ اس تہذیبی، سیاسی اور سماجی زوال کے طوفان میں قوم کو ایک ایسے مسیحا کی ضرورت تھی جو ان کے ٹوٹے ہوئے حوصلوں کو دوبارہ جوڑ سکے۔ ایسے کٹھن وقت میں اردو شاعری نے اپنے روایتی خول سے باہر نکل کر قوم کا کھویا ہوا وقار بحال کرنے کا بیڑا اٹھایا، اور اس فکری انقلاب کے صفِ اول کے قائد مولانا حالی بنے۔
اردو شاعری کا روایتی زوال اور حالی کا نظریہِ اصلاح
جنگِ آزادی سے قبل کی اردو شاعری بیشتر فرضی داستانوں، مبالغہ آرائی، مافوق الفطرت عناصراور ذہنی تفریح تک محدود تھی۔ غزل کے مضامین گُل و بلبل، ہجر و وِصال اور زلف و رخسار کے گرد گھومتے تھے۔ حالی نے بجا طور پر محسوس کیا کہ ایک زوال پذیر قوم کے لیے یہ روایتی طرزِ سخن اور فحش گوئی کی حدوں کو چھوتی ہوئی لفاظی ایک "سمِ قاتل” (مہلک زہر) کی حیثیت رکھتی ہے۔
حالی کو پختہ یقین تھا کہ شاعری محض تفریح نہیں بلکہ قوموں میں بیداری اور انقلاب کا ہتھیار ہے۔جیسا قدیم عربی شاعری میں نظر آتا ہے۔ اسی جذبے سے انہوں نے"مقدمہ شعر و شاعری”میں نوجوانوں کو فرسودہ روایات سے ہٹا کر مقصدی ادب کی بنیاد رکھی۔
جب انہوں نے محسوس کیا کہ غزل کی تنگ دامانی میں اصلاحِ قوم اور فطرت نگاری کے وسیع مقاصد نہیں سموئے جا سکتے، تو انہوں نے صنفِ نظم کا انتخاب کیا اور روایتی غزل کو ان الفاظ میں خیرباد کہا:
ہو چکے حالی غزل خوانی کے دن
راگنی بے وقت کی اب گائیں کیا
انجمن پنجاب کے تاریخی مشاعرے اور جدید نظم کا آغاز:
حالی نے اپنے استاد مرزا غالب سے نُدرتِ فکر اور طرزِ ادا کا بانکپن سیکھا تھا، جب کہ نواب مصطفیٰ خان شیفتہ کی صحبت نے ان کے ہاں زبان و بیان کی سادگی پیدا کی۔ مزید برآں، اپنے ایک انگریز استاد کی معاونت سے انہوں نے انگریزی ادب کا گہرا مطالعہ کیا جس نے ان کے ذہنی افق کو مزید وسعت بخشی۔
مولانا محمد حسین آزاد کی رفاقت میں حالی نے انجمن پنجاب (لاہور) کے زیرِ اہتمام منعقد ہونے والے نئے طرز کے مشاعروں میں کلیدی کردار ادا کیا۔ یہ اردو ادب کی تاریخ کے وہ پہلے غیر طرحی مشاعرے تھے جن میں مصرعِ طرح کی بجائے "موضوعات” دیے جاتے تھے۔ حالی نے ان مشاعروں میں اپنی چار شہرہ آفاق نظمیں پیش کیں، جنہوں نے اردو میں جدید نظم نگاری کی باقاعدہ اساس رکھی۔
حالی کی چار شاہ کار نظمیں: موضوعات اور فکری گہرائی
ان چار نظموں کا عمیق مطالعہ اس بات کی گواہی دیتا ہے کہ حالی نے اردو شاعری کو ایک نیا رنگ و آہنگ عطا کیا، جس نے آنے والی نسلوں کو ان کی پیروی پر مجبور کر دیا۔
۱۔ برکھا رت (مناظرِ فطرت کی بے مثال عکاسی)
یہ نظم قدرت کی کاری گری اور اردو میں فطرت نگاری (Nature Poetry) کا ایک شاہکار نمونہ ہے۔ حالی نے بارش سے قبل کی شدید گرمی، جانوروں اور انسانوں کی بے چینی، اور پھر مینہ برسنے کے بعد کائنات پر چھا جانے والی شادابی کو نہایت مہارت سے پینٹ کیا ہے۔ درختوں کے نکھرتے رنگ، چٹختی کلیاں، اور لڑکیوں کا ساون میں جھولا جھولنا،یہ تمام مناظر حالی کے کمالِ مشاہدہ کی دلیل ہیں۔ اگرچہ نظیر اکبر آبادی کے ہاں بھی فطرت کے مناظر ملتے ہیں، لیکن اسے ایک باقاعدہ اور آئیڈیل صنف کے طور پر حالی نے ہی متعارف کرایا۔
۲۔ نشاطِ امید (قومی ترقی کا محرک)
اس نظم میں "امید” جیسی غیر مرئی مگر طاقتور شے کو موضوع بنایا گیا ہے۔ حالی کے نزدیک قوموں کی ترقی اور بڑے سے بڑے معرکوں کی فتح کا دارومدار صرف اور صرف امید پر ہے۔ انسان اگر سب کچھ گنوا بیٹھے لیکن اس کے دل میں امید کی کرن باقی ہو، تو وہ منزلِ مقصود پا لیتا ہے۔ اس کے برعکس، ناامیدی انسان کو اس حد تک اپاہج کر دیتی ہے کہ مال و دولت اور سیم و زر سب بے کار محسوس ہونے لگتے ہیں۔ یہ نظم حالی کی فکری بلندی کا بہترین ثبوت ہے۔
۳۔ حب الوطنی (دھرتی سے محبت کا گیت)
اس نظم میں حالی نے وطن کی محبت، اس کی دل فریب فضاؤں اور تعلیمی و سماجی صورت حال کو موضوع بنایا ہے۔ وطن سے بے پناہ محبت ہی وہ جذبہ ہے جو اس کے مناظر کو شاعر کی آنکھ میں اس قدر حسین بنا دیتا ہے۔ اس نظم کے چند خوب صورت اشعار ملاحظہ کیجئے:
اے سپہر بریں کے سیارو! اے فضائے زمیں کے گل زار و!
اے پہاڑوں کی دل فریب فضا! اے لب جو کی ٹھنڈی ٹھنڈی ہوا!
اے عنادل کے نغمہ سحری! اے شب ماہتاب تاروں بھری!
اے نسیم بہار کے جھونکو! دہر نا پائیدار کے جھونکو!
۴۔ مناظرہ رحم و انصاف (اخلاقی اقدار کا درس)
یہ ایک تمثیلی نظم ہے جس میں "رحم” اور "انصاف” کے درمیان مکالمہ پیش کیا گیا ہے۔ دونوں اپنی اپنی برتری اور عظمت ثابت کرنے کی کوشش کرتے ہیں، جبکہ "عقل” ان کے درمیان ثالث (Judge) کا کردار ادا کرتے ہوئے دونوں کو ان کی اصل اہمیت اور دائرہ کار سے آگاہ کرتی ہے۔
صنفِ نسواں کے حقوق اور حالی کا دردمند دل
حالی کی شاعری کا کینوس انتہائی وسیع تھا۔ انہوں نے ہندوستانی سماج میں پسی ہوئی عورت کے دکھوں کو شدت سے محسوس کیا۔ خاص طور پر ایک بیوہ عورت معاشرے میں جن تکالیف، طعنوں اور مصائب کا شکار ہوتی تھی، اسے حالی نے اپنی مشہور نظم "مناجاتِ بیوہ” میں نہایت دردمندی سے پیش کیا ہے۔ ایک دکھیاری بیوہ اپنے رب کے حضور یوں فریاد کرتی ہے:
اے مرے زور اور قدرت والے، حکمت اور حکومت والے
میں لونڈی تیری دکھیارے، دروازے کی تیری بھکاری
موت کی خواہاں جان کی دشمن، جان اپنی ہے آپ اجیرن
اپنے پرائے کی دھتکاری، میکے اور سسرال پہ بھاری
سمہ کے بہت آزار چلی ہوں، دنیا سے بیزار چلی ہوں
دل پر میرے داغ ہیں جتنے، منہ میں بول نہیں ہیں اتنے
دکھ دل کا کچھ کہہ نہیں سکتی، اس کے سوا کچھ کہہ نہیں سکتی
خواتین کی تعلیم و تربیت کے لیے انہوں نے "مجالس النساء” جیسی کتاب لکھی جس کی زبان خالصتاً عام فہم اور عورتوں کے روزمرہ بول چال کے عین مطابق تھی۔ اسی طرح اپنی نظم "چپ کی داد” میں عورت کی خاموش قربانیوں، اس کی عصمت اور معاشرے میں اس کے بلند مقام کا اعتراف ان شاندار الفاظ میں کیا:
اے مائو بہنو بیٹیوں دنیا کی زینت تم سے ہے
ملکوں کی بستی ہو تمہیں دکھ سکھ کی راحت تم سے ہے
تم آسن ہو بیمار کی، ڈھارس ہو تم ناچارکی
دولت ہو تم نادار کی، عسرت میں عشرت تم سے ہے
حالی نے یہ عظیم سچائی بھی بیان کی کہ دنیا کے تمام پیغمبروں، ولیوں اور فلسفیوں کی کامیابی کے پیچھے ایک ماں کی تربیت کا ہاتھ ہوتا ہے:
سرکار سے مالک کے جتنے پاک بند ہیں بڑھے
وہ مائوں کی گودوں کے زینے سے ہیں اوپر چڑھے
عورت کی عظمت کو سلام پیش کرتے ہوئے مزید کہتے ہیں:
کی تم نے اس دارالمحن میں جس محل سے بسر
زیبا ہے گر کہئے تمہیں فخر بنی نوع بشر
مسدس حالی (مدو جزرِ اسلام): اردو ادب کا عظیم ترین کارنامہ
حالی کی ادبی زندگی کا سب سے روشن باب ان کی تخلیق ‘مسدس مد و جزرِ اسلام’ ہے، جسے عرفِ عام میں ‘مسدسِ حالی’ کہا جاتا ہے۔ اس طویل نظم نے اردو شاعری میں تہلکہ مچا دیا اور یہ مسلمانوں کے مذہبی، سماجی اور سیاسی زوال پر ایک ایسا نوحہ ثابت ہوئی جس نے سوئی ہوئی قوم کو جھنجھوڑ کر رکھ دیا۔
اس نظم کے تین بنیادی حصے ہیں:
- پہلا حصہ: ظہورِ اسلام سے قبل عرب کی جہالت، برائیوں اور کائنات کی زبوں حالی کا تاریخی شعور کے ساتھ تذکرہ۔
- دوسرا حصہ: محسنِ انسانیت (صلی اللہ علیہ وسلم) کی آمد کے بعد آنے والا عظیم سماجی و سیاسی انقلاب اور مسلمانوں کی شاندار فتوحات اور عروج کی منظر کشی۔
- تیسرا حصہ: موجودہ دور کے مسلمانوں کی پسماندگی، ذلت، سماجی بے ضابطگی اور اخلاقی گراوٹ کا حقیقت پسندانہ جائزہ۔
اس شاہکار کی اہمیت کا اندازہ سر سید احمد خان کے اس تاریخی قول سے لگایا جا سکتا ہے جو انہوں نے مسدس کی تخلیق پر فخر کرتے ہوئے کہا تھا:
"بے شک میں اس کا محرک ہوا ہوں، اور اس کو میں اپنے اعمال حسنہ میں سمجھتا ہوں، کہ جب خدا پوچھے گا تو دنیا سے کیا لایا، میں کہوں گا میں حالی سے مسدس لکھوالا یا اور کچھ نہیں۔” (موج کوثر، شیخ محمد اکرام ص: ۱۲۵)
اگرچہ مسدس کا بنیادی مقصد اصلاح اور تبلیغ تھا، لیکن اس کے وہ حصے جہاں اسلام کی گزری ہوئی شان و شوکت اور موجودہ ابتری کا نقشہ کھینچا گیا ہے، وہ اردو شعریت کے اعلیٰ ترین نمونے قرار پاتے ہیں۔
یہ بھی پڑھیں: الطاف حسین حالی کی نظم نگاری کی خصوصیات
مرثیہ نگاری اور حالی کی عقل پسندی
حالی نے صنفِ مرثیہ کو بھی روایتی مبالغہ آرائی سے پاک کر کے اس میں حقیقت پسندی اور دردمندی کا رنگ بھرا۔ ان کا لکھا ہوا "مرثیہ غالب” اپنے دور کی ادبی تاریخ، سماجی حالات اور تہذیبی پس منظر کی مکمل دستاویز ہے۔ اس مرثیے میں فصاحت، سلاست اور تاثیر کا ایک ایسا طوفان ہے جو قاری کو اپنے سحر میں جکڑ لیتا ہے۔ اس کا ہر شعر جذبات کی سچی ترجمانی کرتا ہے:
دل میں مدت سے تھی خلش جس کی
وہی برچھی جگر کے پار ہے آج
دلِ مضطر کو کون دے تسکیں
ماتم یارِ غمگسار ہے آج
دل کو باتیں جب اس کی یاد آئیں
کلامِ حالی کی نمایاں خصوصیات اور ادبی مقام
مولانا الطاف حسین حالی کی شاعری اور مثنویوں کی سب سے بڑی خوبی ان کی عقل پسندی (Rationality) اور واقعیت (Realism) ہے۔ انہوں نے حسن و عشق کی فرضی داستانوں کے بجائے زندگی کی ٹھوس حقیقتوں کو موضوع بنایا۔ ان کے کلام میں ایک عجیب سا توازن، ٹھہراؤ، سادگی، نرمی اور دھیما پن ہے۔ وہ جذبات کی رو میں بہنے کے بجائے اپنے عزم کو ضابطے اور خودداری کے تابع رکھتے ہیں۔
یہ بھی پڑھیں: حالی کی نظموں کی موضوعاتی وفنی اہمیت
اگر "ترقی پسندی” کا مفہوم معاشرے کی بہتری اور تعمیری سوچ ہو، تو بلاشبہ حالی اردو کے پہلے ترقی پسند شاعر ہیں۔ ان کی شاعری کا واحد مقصد قوم کو اس کے شاندار ماضی سے جوڑ کر ان کے مستقبل کو سنوارنا تھا۔ اسی لیے مشہور نقاد رشید احمد صدیقی نے انہیں بجا طور پر "ماضی کا شاعر” قرار دیا ہے۔
حالی اور انقلابی شاعری نے اردو ادب کو مقامی تنگیوں سے چھڑا کر قومی و عالمی مسائل کی وسعتوں سے ہم آہنگ کیا، شعر و سخن کے کینوس پر زندگی کی صداقت بکھیر دی، اور یہی وجہ ہے کہ ان کی یاد اردو آسمان پر ابدی تارے کی مانند جگمگاتی رہے گی۔
نظر ثانی و تصحیح: فرح شوکت بی۔ایس اُردو،(گورنمنٹ گرلز ڈگری کالج سرگودھا روڈ فیصل آباد)